Rajeev Menon’s Article👍 Followed by my Experience

Time Set To Read 10 Minutes Maximum

ജീവിതം മുൻകൂട്ടി എഴുതപ്പെട്ട ഒരു തിരക്കഥയാണോ എന്ന് എനിക്ക് പലപ്പോഴും സംശയം തോന്നിയിട്ടുണ്ട്. നമുക്ക് കാര്യമായി അതിൽ ഒന്നും ചെയ്യാനില്ല എന്നും തോന്നാറുണ്ട്. അപൂർവ്വം ചില സന്ദർഭങ്ങളിൽ ചെറിയ ചില തീരുമാനങ്ങൾ എടുക്കാനുള്ള സ്വാതന്ത്ര്യം ഉണ്ടെന്നു നമ്മൾ കരുതുന്നുണ്ടെങ്കിലും, ആ സ്വാതന്ത്ര്യം പോലും നാം അഭിനയിക്കുന്ന തിരക്കഥയുടെ മുൻകൂട്ടി കാണാനാകാത്ത ചില ട്വിസ്റ്റുകൾക്കു വേണ്ടി ചിട്ടപ്പെടുത്തിയിട്ടുള്ളതായിട്ടാണ് എനിക്ക് തോന്നിയിട്ടുള്ളത്.

നടനും തിരക്കഥാകൃത്തും, സംവിധായകനും, കേരളത്തിലെ ഏറ്റവും വലിയ ബുദ്ധിജീവിയുമായ ശ്രീനിവാസൻ അടുത്തിടെ വെളിപ്പെടുത്തിയ അദ്ദേഹത്തിന്റെ ഒരനുഭവം നിങ്ങളെല്ലാവരും കേട്ടു കാണും, അദ്ദേഹം പ്രീഡിഗ്രിക്ക് പഠിക്കുന്ന സമയത്ത് ഒരു കൈനോട്ടക്കാരനെ കണ്ട കഥയാണത്. കുമാരൻ മാഷ് എന്ന മുതിർന്ന ഒരു സ്നേഹിതന്റെ താല്പര്യപ്രകാരം അദ്ദേഹം കൂത്തുപറമ്പിലുള്ള ഒരു കൈനോട്ടക്കാരനെ കാണാൻ പോയത്രേ. പൊതുവെ, കൈനോട്ടം, ജ്യോതിഷം, ദൈവവിശ്വാസം എന്നിവയോടൊക്കെ അന്നും ഇന്നും പുച്ഛമുള്ള ശ്രീനിവാസൻ യാത്ര തുടങ്ങിയപ്പോൾ മുതൽ ടി കുമാരൻ മാസ്റ്ററെ വിമർശിക്കാൻ തുടങ്ങിയിരുന്നു. അവിടെ ചെന്ന് കുമാരൻ മാസ്റ്ററുടെ കൈ നോക്കി ഫലം പറഞ്ഞതിന് ശേഷം കൈനോട്ടക്കാരൻ ശ്രീനിവാസന്റെ കൈ നോക്കണമോ എന്ന് ചോദിച്ചു. വേണ്ട എന്ന് മറുപടി പറഞ്ഞ ശ്രീനിവാസനെ പണമൊന്നും തരേണ്ടതില്ല എന്നു പറഞ്ഞ് പ്രലോഭിപ്പിച്ചതിന്റെ ഫലമായി ശ്രീനിവാസൻ ഒരു തമാശയ്ക്ക് അയാളുടെ മുൻപിൽ കൈ നീട്ടിക്കൊടുത്തു….!

നിങ്ങൾ വലിയൊരു സിനിമാ നടൻ ആയിത്തീരും, ഒപ്പം എഴുത്തുകാരനും, സംവിധായകനുമാകും. മാത്രമല്ല, ചക്രവർത്തിയുടെ കയ്യിൽ നിന്ന് പട്ടും വളയും വാങ്ങാനുള്ള യോഗവും കാണുന്നു എന്നും അയാൾ പ്രവചിച്ചുവത്രേ. തിരികെ വീട്ടിലേക്കു പോരുമ്പോൾ ടി. കുമാരൻ മാസ്റ്ററെ ശ്രീനിവാസൻ കൊന്നില്ല എന്നു മാത്രമേയുള്ളൂ.!

ശ്രീനിവാസന്റെ തന്നെ ഭാഷയിൽ പറഞ്ഞാൽ, അക്കാലത്തെ തല മൊട്ടയടിച്ച, തന്റെ കോലം കണ്ടാൽ ആരും ഭയന്നുപോകും, ആ തന്നോടാണ് സിനിമാനടനാകും എന്ന കൈനോട്ടക്കാരന്റെ പുളുവടി. ഇവരൊക്കെ തനി ഫ്രോഡുകൾ ആണെന്ന് മനസ്സിലാക്കാൻ ഇത്രയൊക്കെ പോരെ, എന്റെ മാഷേ? എന്ന് ചോദിച്ചുകൊണ്ട് യാത്രയിലുടനീളം ശ്രീനിവാസൻ കുമാരൻ മാഷെ കളിയാക്കി പോലും.

വർഷങ്ങൾ കടന്നുപോയി, വിധിയുടെ നിയോഗം പോലെ ശ്രീനിവാസൻ നടനും കഥാകൃത്തും സംവിധായകനുമായി മാറി. കൂത്തുപറമ്പിലെ കൈനോട്ടക്കാരനെ ശ്രീനിവാസൻ അതിനിടയിൽ മറന്നു പോയിരുന്നു. ചിന്താവിഷ്ടയായ ശ്യാമളക്ക് രാഷ്ട്രപതിയുടെ അവാർഡ് ലഭിച്ചതിനു ശേഷം, കണ്ണൂരിലേക്കുള്ള യാത്രയിൽ പെട്ടെന്ന് ശ്രീനിവാസന് പഴയ കൈനോട്ടക്കാരന്റെ പ്രവചനം ഓർമ്മവന്നു. ഒരു ഞെട്ടലോടെ കാർ കൂത്തുപറമ്പിലേക്ക് വിടാൻ അദ്ദേഹം ഡ്രൈവറോട് പറഞ്ഞു. പക്ഷെ അദ്ദേഹം അവിടെയെത്തിയപ്പോൾ ആ കൈനോട്ടക്കാരൻ ഇരുന്നിരുന്ന സ്ഥലം ഒഴിഞ്ഞു കിടന്നിരുന്നു.

തന്റെ ജീവിതത്തിൽ നടന്ന ഈ അത്ഭുതത്തെക്കുറിച്ച് പറഞ്ഞു നിർത്തിക്കൊണ്ട് ശ്രീനിവാസൻ ചോദിച്ച ഒരു ചോദ്യമാണ് ഞാൻ പോസ്റ്റിന്റെ ആദ്യവരിയായി എഴുതിയത്. ശ്രീനിവാസന്റെ ജീവിതത്തിൽ ഇക്കാര്യങ്ങളെല്ലാം സംഭവിക്കാൻ പോകുന്നു എന്ന് ആ കൈനോട്ടക്കാരൻ എങ്ങനെ മുൻകൂട്ടി കണ്ടു? ജീവിതം മുൻകൂട്ടി എഴുതപ്പെട്ട ഒരു തിരക്കഥയാണോ? സ്വന്തം പ്രയത്നം കൊണ്ട് നടനും തിരക്കഥാകൃത്തുമൊക്കെയായി മാറാൻ ശ്രീനിവാസന് കഴിഞ്ഞു എന്ന് ശാസ്ത്രത്തിൽ മാത്രം വിശ്വസിക്കുന്നവരോട് ഒരു വാദത്തിനു വേണ്ടി സമ്മതിക്കാമെങ്കിൽ പോലും, അദ്ദേഹത്തിന് രാഷ്ട്രപതിയുടെ പട്ടും വളയും അധ്വാനിച്ച് നേടാൻ കഴിയില്ലല്ലോ? രാജീവ് മേനോൻ എന്ന എനിക്ക് വായനക്കാരെ ബുദ്ധിമുട്ടിക്കുന്നതിനു വേണ്ടി കഷ്ടപ്പെട്ട് നോവലെഴുതാൻ കഴിയും, എന്നാൽ അതിനു കേന്ദ്ര സാഹിത്യ അക്കാദമി അവാർഡ് പരിശ്രമിച്ചു നേടാൻ കഴിയില്ലല്ലോ?

വിജയ് മല്ല്യ ലണ്ടനിൽ ഒരു ലോക്കൽ ട്രെയിനിൽ യാത്ര ചെയ്യുന്ന ഒരു ചിത്രം ഞാൻ ഈ അടുത്തിടെ കണ്ടിരുന്നു. സ്വന്തം ജെറ്റിൽ ലോകം മുഴുവൻ പറന്നു നടന്നിരുന്ന മല്യ ലോക്കൽ ട്രെയിനിൽ ആളുകളുടെ ഇടയിൽ നിൽക്കുന്ന ചിത്രം പൂന്താനത്തിന്റെ ഞാനപ്പാനയാണ് എന്നെ ഓർമ്മിപ്പിച്ചത്. ഇരുപതാമത്തെ വയസ്സിൽ, അദ്ദേഹത്തിൻറെ പിതാവിന്റെ മരണത്തെത്തുടർന്ന്, ലോകത്തിനെ മൂന്നാമത്തെ വലിയ ബ്രൂവറീയുടെ ഉടമയായ വിജയ് മല്ല്യയുടെ ജീവിതം എന്തായിരുന്നു എന്നും, ഇപ്പോൾ എന്താണെന്നും നമുക്കറിയാം.

ഒരു പക്ഷെ മല്യയുടെ ജീവിതവും ഇതുപോലുള്ള ഒരു തിരക്കഥയുടെ ഭാഗമല്ലേ? അല്ലെങ്കിൽ അത്രയേറെ ജീവിതസൗകര്യങ്ങൾ ഉള്ള ഒരാൾ എങ്ങനെ ഇത്ര വലിയ കടക്കെണിയിൽ ചെന്നുപെട്ടു?

നിങ്ങൾക്ക് നാൽപ്പതു വയസ്സു കഴിഞ്ഞെങ്കിൽ നിങ്ങളൊന്നു തിരിഞ്ഞു നോക്കൂ, കൗമാരത്തിലോ യവ്വനത്തിലോ നിങ്ങൾ കണക്കുകൂട്ടിയ എവിടെയെങ്കിലുമാണോ നിങ്ങൾ ചെന്ന് നിൽക്കുന്നത്?

ഒരിക്കലും ആയിരിക്കില്ല. നമ്മുടെ ജീവിതത്തിന്റെ തിരക്കഥയുടെ സീനുകളിൽ അഭിനയിച്ച് അഭിനയിച്ച്, ജീവിതം തെളിക്കുന്ന വഴിയിലൂടെ മുന്നോട്ടു പോകാൻ നമ്മൾ ശീലിച്ചിരിക്കുന്നു എന്നതല്ലേ ശരി?

നാം ഉദ്ദേശിക്കുന്ന ഒരു ജീവിതമൊന്നും നമുക്ക് കെട്ടിപ്പടുക്കാൻ സാധിക്കുകയില്ല എന്നതാണ് ലോക സത്യം. യവ്വനാരംഭത്തിൽ ജീവിതത്തിന്റെ കടിഞ്ഞാൺ പിടിച്ച് നാം അതിനെ സ്വന്തം ഇഷ്ടപ്രകാരം തെളിക്കാൻ ശ്രമിക്കാതിരുന്നിട്ടില്ല. എന്നാൽ നാം ഉദ്ദേശിച്ചിടത്തേക്ക് പോകാത്തതുകൊണ്ട് അത് പോകുന്ന വഴിയേ നാമെല്ലാവരും നിരാശയോടെ മുന്നോട്ടു പോകുന്നു എന്നതാണ് വാസ്തവം.

കോവിഡ് എന്നൊരു സംഭവം എത്രയോ പേരുടെ ജീവിതങ്ങളെ മാറ്റിമറിച്ചു. അതൊക്കെ നമ്മൾ പ്രതീക്ഷിച്ചതാണോ? അത്രയും അനിശിതത്വം നിറഞ്ഞതാണ് ഓരോരുത്തരുടെയും ജീവിതവും. ഇന്ന് രാവിലെ ഉണർന്നതുകൊണ്ട് നാളെ രാവിലെയും ഞാൻ ഉണരും എന്നൊരു പ്രതീക്ഷയോടെ നമ്മൾ സ്വപ്‌നങ്ങൾ നെയ്യുന്നു എന്നുമാത്രം. ആ സ്വപ്നങ്ങൾക്ക് ജീവിതവുമായി ഒരു ബന്ധവുമില്ല എന്ന് കാലക്രമേണ ജീവിതം തന്നെ നമുക്ക് മുൻപിൽ വെളിപ്പെടുത്തുകയും ചെയ്യും.!

പക്ഷെ നമ്മുടേതല്ലാത്ത കാരണം കൊണ്ട് നമുക്ക് ലഭ്യമായ ഈ ജീവിതത്തിൽ ഒട്ടും നിരാശയുടെ ആവശ്യമില്ല. നമ്മൾ സന്തോഷിച്ചാലും നിരാശപ്പെട്ടാലും, നമ്മുടെ തിരക്കഥയിൽ നിന്ന് ഒരു സീൻ പോലും മാറി അഭിനയിക്കാനുള്ള സ്വാതന്ത്ര്യം നമുക്കില്ല. അങ്ങനെ സ്വാതന്ത്ര്യം ഉണ്ടായിരുന്നെങ്കിൽ എല്ലാവരും സ്വന്തം ഇഷ്ടപ്രകാരം ഇപ്പോൾ അംബാനിയോ, യുസഫലിയോ, മോഹൻലാലോ, ടെണ്ടുൽക്കറോ ഒക്കെ ആയി മാറുമായിരുന്നല്ലോ?

അപ്പോൾ നമ്മുടെയൊക്കെ ജീവിതം അതിനു തിരക്കഥ എഴുതിയ ആളുടെ ഇച്ഛപ്രകാരം നടക്കട്ടെ. അതിനൊപ്പം സംതൃപ്തിയോടെ മുന്നോട്ടു പോകുക എന്നത് മാത്രമാണ് നമുക്കുമുൻപിൽ ആകെയുള്ള ചോയ്‌സ്. ഇക്കാര്യത്തിൽ പലർക്കും പല എതിർവാദങ്ങളും കാണും!

നോക്കൂ എന്റെ ജീവിതം ഞാൻ വിചാരിച്ചതുപോലെ ഞാൻ കെട്ടിപ്പടുത്തു എന്ന് പറയുന്ന വളരെ നേരിയ ഒരു ശതമാനം ആളുകൾ ഉണ്ടായെന്നു വരാം. അതുപക്ഷേ അയാളുടെ ജീവിതത്തിന്റെ തിരക്കഥയും, അയാളുടെ ലക്ഷ്യവും ഒരു രേഖയിൽ വന്നു എന്ന അപൂർവത കൊണ്ടുമാത്രമായിരിക്കാം എന്നാണ് ഞാൻ കരുതുന്നത്. ഭൂരിഭാഗം ആളുകളും തങ്ങൾക്ക് ലഭിച്ച ജീവിതത്തിൽ സംതൃപതരായിക്കാൻ വഴിയില്ല. കാരണം, നമ്മുടെ ജീവിതം നമ്മുടെ ഇഷ്ടപ്രകാരമല്ലാതെ ആരോ മുൻകൂട്ടി ചിട്ടപ്പെടുത്തിയ ഒരു തിരക്കഥയുടെ ആവിഷ്കരണം ആണെന്നത് തന്നെയായിരിക്കണം.!

ജീവിതത്തെ അതിന്റെ പാട്ടിനു വിടുക, നമ്മളെ ഓരോരുത്തരെയും ഹീറോയോ, വില്ലനോ, പണക്കാരനോ, ഭിക്ഷക്കാരനോ ആക്കുന്നത് ആരോ എഴുതിയയ ആ തിരക്കഥയുടെ ഭാഗമാണെന്നു കരുതുക, കടന്നുപോകുന്ന ഓരോ നിമിഷവും ആസ്വദിച്ച് അഭിനയിക്കുക. മനസ്സമാധാനത്തോടെ കിടന്നുറങ്ങാൻ അത് ഉപകരിക്കും.

മുകളിൽ പറഞ്ഞത്? ശ്രീ രാജീവ് മേനോന്റെ വാക്കുകളായിരുന്നു! ഇന്ന് കിട്ടിയ ഒരു ഫോർവേഡ് മെസേജ്! നിമിത്വത്തിലും ജ്യോതിഷത്തിലും വിശ്വസിക്കുന്നവരെ സംബന്ധിച്ചേടത്തോളം ഇത് വളരെ ശരിയും സത്യവും എന്ന് വിശ്വസിക്കാം.

സമാനമായ ഒരനുഭവമാണ് ഡി ജി പി ആയിരുന്ന ജേക്കബ് അലക്‌സാണ്ടറും ഒരു യു ടുബ് വീഡിയോവിലൂടെ നമ്മളോട് പങ്കുവെച്ചതും ഇതോടൊപ്പം ഷെയർ ചെയ്യുന്നു . ഞാൻ ഇതൊക്കെ പറഞ്ഞു വരുന്നത് സമാനമായ അനുഭവം എന്റെ ജീവിതത്തിൽ എനിക്ക് അനുഭവത്തിൽ ഉണ്ടായതും, ഉണ്ടായിക്കൊണ്ടിരിക്കുന്നതും കൊണ്ടാണ്.

https://www.google.com/url?sa=t&source=web&rct=j&url=https://m.youtube.com/watch%3Fv%3DNdd-er6IjwM&ved=2ahUKEwiU9afFqN3yAhWd4nMBHcvuCRAQwqsBegQIBhAE&usg=AOvVaw1G2s3H1bZ3Oprmk_d4ma7G

ഞാനും നിമിത്വത്തിലും ജ്യോതിഷത്തിലും വിശ്വസിക്കുന്നു . ശ്രീനിവാസന്റെ കഥ പറഞ്ഞത് പോലെ? പണ്ട് പഠിക്കുമ്പോൾ ഒരു കൈ നോട്ടക്കാരന്റെ അടുത്തു പോയിരുന്നു. ഇദ്ദേഹം സ്ഥിരമായി ഇരിക്കുന്ന സ്ഥലം. കണ്ണൂർ ടെലിഫോൺ എക്സ്ചേഞ്ച പരിസരം . ഒരു ദിവസം ഇദ്ദേഹത്തെ കാണാൻ ഞാനും പോയി.

കൈയ്യൊക്കെ നോക്കി എന്നോട് പൊതുവെ എല്ലാ ജോതിഷരും പറയുന്നത് പോലെ! കഴിഞ്ഞു പോയ കുറെ കാര്യങ്ങൾ പറഞ്ഞു! എല്ലാം കൃത്യം. പിന്നെ ഇപ്പോൾ നടക്കുന്ന ചില കാര്യങ്ങളും. ഇതിനിടയിൽ നമ്മളെ പറ്റി പുകഴ്ത്തിയും പറയും. ഇടയ്ക്കു കുറച്ചു ഉപദേശവും തരും, കൂട്ട് കച്ചവടം പാടില്ല. പണം കടം കൊടുക്കരുത്! ജാമ്മ്യം നിൽക്കരുത്. ശത്രുക്കൾ ഉണ്ടു! ബന്ധുക്കളുടെ അനിഷ്ടം കാണേണ്ടി വരും എന്നൊക്കെ?

പിന്നീട് ഭാവിയെ പറ്റി പറയും. എന്നോട് ഇദ്ദേഹം പറഞ്ഞത് വെള്ളവുമായി ബന്ധപ്പെട്ടുള്ള ബിസിനസ്സായിരിക്കും. അല്ലെങ്കിൽ ജോലിയും അതുമായി ബന്ധപ്പെട്ടതായിരിക്കും എന്ന് . അങ്ങനെ അദ്ധ്യമായി ജോലിക്കു അപേക്ഷിച്ചത് മർച്ചന്റ് നേവിയിലേക്കു , രണ്ടവസരം ലഭിച്ചിരുന്നു ചില സങ്കേതിക കരണംപറഞ്ഞു അവസരം നഷ്ട്ടപ്പെട്ടു. പറഞ്ഞുവരുന്നത് വെള്ളവുമായി ബന്ധപ്പെട്ട ജോലി , ബിസിനസ്സ് എന്ന് പറയുമ്പോൾ അത് ചായക്കടമുതൽ? ദ്രാവക രൂപത്തിലുള്ള എന്തുമാവാം. തുടർന്ന് അതിന്റെ വിശദീകരണത്തിൽ വീണ്ടും പറഞ്ഞു കടലുമായി ബന്ധപെട്ടതാവാം. കപ്പലിലെ ജോലി യാവാം. ഐസു മായി (Ice) ബന്ധപ്പെട്ടുള്ളതാവാം. അങ്ങനെ… പിന്നീട് ഞാൻ പണിക്കന്മാരെടുത്തു പോയാലും പ്രവചിക്കുക ഏറെക്കുറെ ഇതേ കാര്യങ്ങൾ തന്നെ? കാലം പോകെ എന്റെ ആദ്ധ്യ ബിസിനസ്‌ മദ്ധ്യ വ്യാപാരം, തുടർന്ന് മരുന്ന് ഷോപ്പ് . നോക്കുമ്പോൾ ഇത് രണ്ടും വെള്ളവുമായി ബന്ധപെട്ടു തന്നെ.. വീണ്ടും ടെക്ക്നിക്കൽ ആയി പഠിച്ചത് എസുമായി (Refrigeration) ബന്ധപ്പെട്ടത്. രണ്ടു തവണ ജോലിക്കു ഇന്റർവ്യു പോയത് കപ്പലുമായി ബന്ധപ്പെട്ടത്. വീണ്ടും ഒരു ജോലിക്കു ഇന്റർവ്യു ലഭിച്ചത് എസുമായി ബന്ധപെട്ടു പഠിപ്പിക്കുന്ന ജോലിക്കു.. ഈ അവസരങ്ങൾ നഷ്ടപ്പെട്ടപ്പോൾ ദുബായിൽ പോയി.. കിട്ടിയത് സീ ഫുഡ്ഡ് പ്രോസസിങ് കമ്പനിയിൽ. ഏകദേശം 5 – 6 കൊല്ലം , അവിട നിന്നും മാറി പിന്നീട് ജോലി കിട്ടിയതും ഷിപ്പിംഗ്‌മായി ബന്ധപ്പെട്ടത് ? അവിടെനിന്നു വീണ്ടും മാറി കപ്പലിൽ തന്നെ പോയി ഇൻസ്പെക്ഷൻ ചെയ്യുന്ന ജോലി..

മുകളിൽ രാജീവ് മേനോൻ പറഞ്ഞതും ഡി.ജി.പി അലക്‌സാണ്ടർ ജേക്കബ് സാർ ഒക്കെ പറഞ്ഞത് പോലെ അവരുടെ അനുഭവം വിവരിച്ചതുപോലെ , സംഭവിച്ചതു പോലെ എന്റെ ചെറുപ്പത്തിൽ എന്താണോ അസ്‌ട്രോളജിക്കൽ പ്രഡിക്ഷൻ? അത് ആണു കിട വ്യത്യാസമില്ലാതെ സംഭവിച്ചിരിക്കുന്നു എന്ന് വ്യക്തമാക്കാൻ ഞാൻ ആ രണ്ടു സംഭവും ഉദാഹരണമായി റഫറൻസായി വെച്ച് വെന്നു മാത്രം..

രാജീവ് മേനോന്റെയും ശ്രീനിവാസന്റെയും ഒക്കെ കഥ വായിച്ചപ്പോൾ എന്റെ ഈ കഥയും നിങ്ങളോട് പങ്കു വെക്കാം എന്ന് തോന്നി. അത്ര മാത്രം.

പറഞ്ഞു വരുന്നത് വിശ്വാസികളെ സംബന്ധിച്ചേടത്തോളം? എല്ലാവരുടെയും ജീവിത ക്രമങ്ങളൊക്കെ മുൻകൂട്ടി നിശയിക്കപ്പെട്ടതു തന്നെ? അത് ഫലത്തിൽ വരാൻ ചില കാല മാറ്റങ്ങൾ ഉണ്ടാവാം അത്ര മാത്രം..

മഠത്തിൽ ബാബു ജയപ്രകാശ് ✍️ My Watsapp Cell No: 00919500716709